Lo tsotèn valdotèn l’è reutso de fihe é de manifestachón

Lo tsotèn valdotèn l’è reutso de fihe é de manifestachón. Tcheu le paì fan de to pe fée cougnihe lo mioù pousiblo leur prodouì é pe se fée dzen i jouè di touriste que pason le vacanse en tchi no. Tcheu le feun de senaa t’o moque da chèdre ioi alé.  A partì de la Bosa Valoda canque i Mon-Blàn, da Cogne a Votornentse, n’a pe tcheu le gou : fromadzo, tsir, salàn, veun, pitchoù martchà, artizanà, parcour a coleur, djouà. Le touriste que vignon i nouhe fihe s’en van atò lo sourie é la voya dé tourné deun hi paì, p’agouhé le prodouì é tourné vire nouhe dzen llouà.

Mi, dirì eun vèiro de veun, dirì an fourma de fromadzo ou eun dèi de salàn y è bièn de pi de hen que eun pou vire. Lèi son le dzi.

Le dzi d’eun paì que, totte eunsemblo, se beutton a traillé sensa paye é sensa s’aplanté péquè lo fan pe lo bièn di paì, pe pasé de dzen moumàn eunsemblo é pe mouhé i mèinoù qué fou se baillé eun cou de man eun hi mondo p’aì coutsouza.

Dirì an dzenta manifestachón y è bièn de traille. Fou fée bièn dé réugnón, fou s’acapé soèn pe chèdre henque fée, henque apreusté, queunse joueur chèdre pe la mezeucca, ioi fée la spèiza, avouì qui loyé lo palquè, rendre dzen lo paì. Hisse son fran le moumàn pi dzen. Le dzi di paì se trouon totte eunsemblo. Le pro loco ou le-z-assochachón aruon a boudjé fran totta la populachón pe baillé eun cou de man. Y è todzor de senten-e de volontéo que traillon : laon le-z-éze, apreuston midjé, pouliton le toble, retèrion to. É se vo capite d’èitché deun le quezun-e vo pourio vire tcheu le volontéo ou que sourion ou que tsanton ou bièn que se fan doe riode.

Traillé pe lo paì èidze la populachón a se sentì par de coutsouza é po djeusto eun numéró é permè de s’aprotché le-z-eun i-z-otre.

Donque mersì a tcheu hisse que no fan fée pasé de dzen moumàn to l’an, de magnii d’aì la scuza pe viondé pe la Val d’Ouha p’agouhé nouhe prodouì é cougnihe de poste que son la feun di mondo.

É, can la fiha l’è feniya, eun bon vèiro de veun que no-ze tsoide, no fa sentì eun fameuille é « fa bon san ». Santì !

-----------------------------------------------------

L’estate valdostana è ricca di feste e manifestazioni. Ogni paese fa a gara per far conoscere al meglio i propri prodotti e per farsi bello agli occhi dei tanti turisti che passano le vacanze in Valle d’Aosta. Ogni fine settimana hai solo da decidere dove preferisci andare, dalla Bassa Valle al Monte Bianco, da Cogne a Valtournenche ce n’è per tutti i gusti: formaggio, carne, salame, vino, mercatini, artigianato, percorsi colorati, giochi. I turisti che partecipano alle nostre feste restano col sorriso e con la voglia di tornare nuovamente in quel paese, ad assaggiare quei prodotti e a rivedere i nostri bei paesaggi.

Ma dietro ad un bicchiere di vino, dietro un formaggio o ad un salame c’è molto di più di quello che uno può vedere. Ci sono le persone.

La gente di un paese lavora insieme per la realizzazione dell’evento, senza paga, senza remunerazione, senza fermarsi perché lo fa per il bene del paese stesso, per passare dei bei momenti in compagnia, per insegnare ai bambini che bisogna aiutarsi l’un l’altro per realizzare ciò in cui si crede.

Dietro ad una manifestazione c’è molto lavoro. Bisogna fare molte riunioni, bisogna vedersi spesso per decidere cosa fare, cosa preparare, chi chiamare a suonare, dove fare la spesa, affittare il padiglione, abbellire il paese. Ma questi sono proprio i momenti più belli. La gente del paese si ritrova, pro loco, o associazioni riescono davvero a muovere tutta la popolazione per dare una mano. Ogni volta centinaia di volontari si presentano per lavorare: lavano i piatti, preparano da mangiare, puliscono i tavoli, ritirano. E se vi capita di passare nelle cucine durante una manifestazione li vedete tutti sorridere mentre cantano una canzone e si fanno due risate.

Lavorare così per il paese aiuta la popolazione a sentirsi parte di qualcosa, non solo un numero, e ciò contribuisce acreare e rafforzare il senso di comunità.

Quindi grazie a coloro che fanno in modo di farci passare dei bei momenti, che ci permettono di girare la Valle d’Aosta in lungo e in largo assaggiando tutti i nostri prodotti e di conoscere luoghi e paesaggi che sono la fine del mondo.

E quando la festa è finita, a tutti viene dato un buon bicchiere di vino che scalda il cuore, che fa sentire in famiglia e che fa “buon sangue”. Cin!