L’è belle avouì le soque que le revoluchoùn di valdotèn son itaye féte, de la bassa vallaye tanque si eun Veulla!
S’aprotse eun di pi grou randévoù de la Val d’Ousta : la Fèira de Sent-Or. Tcheut le-z-artizàn valdotèn parton vito vito lo mateun pe moutré leur bocón que l’an aprestoù a traèe de l’an.
N’at qui fé de squeulteure é qui de pou eun bouque, qui apreste de caoutì é qui fé de baquette, qui apreste de-z-achette é qui fé d’orlodzo, qui travaille lo bouque é qui la pira.
Euntre totte seutte dzi n’at étó salle que féyoun de Soque. De soque ? Senque soun-tì le soque ? Dimandade a noutro vioù, cheur que le cougnissoun, é belle bièn. Le soque sayàn fran le botte di Valdotèn é tcheut l’ayàn maque salle i pià, avouì de bo tsaoussoùn de lan-a pe pa crendre lo fret.
Si é ba pe le tsemeun te le sentae passé. “Clic clac clic clac”, comme diave Jean Domaine deun sa tsansoùn. Todzor Domaine tsantave: “Pappa lé tsossave pe sapé lo tsan, to lo dzor i mitcho le trèinave pappagràn, mamma le betave pé lo piillo itor di fouà…”. Totta la fameuille portave le soque, le vioù é ‘có le mèinoù. Mi ara? “le ten son passoù, la moda l’è tchandjaye, le vioù é le mèinoù l’an totte floradjaye…”.
L’è pamì lèin-o de troué de dzi que beuttoun ‘có le soque, de cou deun le véillà pe baillì tchica de couleue ou deun le fèire pe moutré le noutre tradechoùn. Damadzo. Le soque l’an todzor tegna-no llattoù eunsemblo. L’è belle avouì le soque que le revoluchoùn di valdotèn son itaye féte, de la bassa vallaye tanque si eun Veulla.
Lo Gnalèi
__________
Si avvicina uno dei più importanti appuntamenti per la Valle d’Aosta: la Fiera di Sant’Orso. Tutti gli artigiani valdostani usciranno prestissimo di casa per esporre i lavori svolti durante tutto l’anno.
C’è chi realizza sculture e chi galletti in legno, chi fa coltelli e chi bastoni, chi fa piatti e chi orologi, chi lavora il legno e chi la pietra.
Tra tutti questi artigiani c’è anche chi fa i sabot. Sabot? Ma di che si tratta? Se chiedete alle persone più anziane, sicuramente lo sapranno e anche bene. I sabot erano proprio le calzature di legno dei valdostani e tutti avevano sempre quelle ai piedi, con delle belle calze di lana per proteggersi dal freddo.
Su e giù per le strade si sentiva camminare. “Clic clac clic clac” - diceva Jean Domaine nella sua canzone - “Papà li calzava per zappare il campo, tutto il giorno in casa li trascinava il nonno, mamma li indossava in casa accanto al focolare”. Tutta la famiglia portava i sabot, anziani e bambini. Ma ora? “I tempi sono andati, la moda è cambiata, i vecchi e i bambini li hanno tutti fioriti”.
Non è facile trovare qualcuno che indossi ancora i sabot. Talvolta durante le veillà per fare folclore o alle fiere per mostrare quali erano le nostre tradizioni. Peccato. I sabot ci hanno sempre tenuti legati. È con i sabot che sono state fatte le rivoluzioni dei Valdostani, dalla bassa Valle fino ad Aosta.